လွှတ်တော်ရုပ်သံလိုင်း စမ်းသပ်ထုတ်လွှင့်၊ ပြည်သူ့လွှတ်တော် ၀က်ဘ်ဆိုက်ကိုလည်း စတင်လွှင့်တင်

ယခုလ (၄)ရက်နေ့က စတင်ကျင်းပသော လွှတ်တော်အစည်းအဝေး ကျင်းပပြုလုပ်ပုံများကို SKY Net ၏လွှတ်တော်ရုပ်သံလိုင်းမှ စမ်းသပ်ထုတ်လွှင့်လျက်ရှိပြီး လွှတ်တော်ဆိုင်ရာဝက်ဘ်ဆိုက်ဖြစ်သော ပြည်သူ့လွှတ်တော်ဝက်ဘ်ဆိုက်ကိုလည်း စတင်လွှင့်တင်ထားကြောင်း သိရသည်။ ပထမအကြိမ် လွှတ်တော်များ၏ စတုတ္ထပုံမှန်အစည်းအဝေးများ ကျင်းပပြုလုပ်ပုံများကို SKY Net ရုပ်သံလိုင်း၏ လွှတ်တော်ရုပ်သံလိုင်း (Hluttaw Channel) အမည်ဖြင့် ၂၀၁၂ခုနှစ်၊ ဇူလိုင်လ ၄ ရက်နေ့မှစ၍ စမ်းသပ်ထုတ်လွှင့်ပေးသွားမည်ဖြစ်ကြောင်း SKY Net ရုပ်သံလိုင်းများက ကြေညာခဲ့သည်။ “တချို့ရုပ်သံလိုင်းတွေ ဖမ်းယူသလို Remote နဲ့ Setting ထဲမှာ ၀င်ရောက်ပြင်စရာမလိုပါဘူး။ ထပ်တိုးရုပ်သံလိုင်းအဖြစ်နဲ့ ထုတ်လွှင့်ထားတာမို့လို့ အလွယ်တကူ ကြည့်ရှုနိုင်ပါတယ်။ လွှတ်တော် Channel ဆိုပြီး လွှင့်ထားတာပါ” ဟု SKY Net အရောင်းကိုယ်စားလှယ်တစ်ဦးကပြောသည်။ ပထမအကြိမ်လွှတ်တော်များ၏ စတုတ္ထပုံမှန်အစည်းအဝေးများ ကျင်းပပြုလုပ်ပုံများကို Live နှင့် Delay များဖြင့် ၂၄ နာရီ စမ်းသပ်ထုတ်လွှင့်လျက်ရှိကြောင်း ကြည့်ရှုသူများကပြောသည်။ ပြည်ထောင်စုသမ္မတ မြန်မာနိုင်ငံတော် မြန်မာနိုင်ငံတော်လွှတ်တော်ရုံး၏ ကြီးကြပ်မှုနှင့် လွှတ်တော်အလိုက်တာဝန်ခံများ၏ စီစဉ်ညွှန်ကြားမှုဖြင့် လွှတ်တော်အတွင်း ပြည်သူ့လွှတ်တော်ကိုယ်စားလှယ်များ၏ ဆောင်ရွက်ချက်များကို မဲဆန္ဒရှင်ပြည်သူများ သိရှိနိုင်စေရေးနှင့် မှန်ကန်သောသတင်းများကို နိုင်ငံတ၀ှမ်း ကျယ်ပြန့်လျင်မြန်စွာ ရောက်ရှိနိုင်စေရန်အတွက် အဆိုပါလွှတ်တော်ရုပ်သံလိုင်းကို စမ်းသပ်ထုတ်လွှင့်သွားမည်ဖြစ်ကြောင်း SKY Net ရုပ်သံလိုင်းများမှ ကြေညာခဲ့သည်။ ၎င်းအပြင် ပြည်သူ့လွှတ်တော်ဝက်ဘ်ဆိုက်ကိုလည်း www.pyitthuhluttaw.gov.mm လိပ်စာဖြင့် စတင်လွှင့်တင်ထားကြောင်း သိရသည်။ အဆိုပါဝက်ဘ်ဆိုက်မှာ Beta Version အနေဖြင့် လွှင့်တင်ထားခြင်းဖြစ်ပြီး ပြည်သူ့လွှတ်တော် ပုံမှန်အစည်းအဝေးရှိသော ရက်စွဲ ၊ အစည်းအဝေးမှတ်တမ်း၊ ဗီဒီယိုမှတ်တမ်း၊ ဓါတ်ပုံမှတ်တမ်းများအပြင် ပြည်သူ့လွှတ်တော်ကိုယ်စားလှယ်များ၏ အမည်၊ မဲဆန္ဒနယ်များကို အလွယ်တကူရှာဖွေနိုင်ရန် ဆောင်ရွက်ထားကြောင်း သိရသည်။ အဖွင့်စာမျက်နှာနှင့် သတင်းနှင့်ပြန်ကြားရေး၊ အစည်းအဝေးများ၊ ကိုယ်စားလှယ်များ၊ ကော်မတီ/ကော်မရှင်များ၊ ဥပဒေဆိုင်ရာများကို သီးခြားစာမျက်နှာဖြင့် ကြည့်ရှုနိုင်မည့်အပြင် မိမိရှာဖွေလိုသောအချက်အလက်များကို Search Box တွင်ရှာဖွေနိုင်မည်ဖြစ်သည်။ အဆိုပါဝက်ဘ်ဆိုက်တွင် ပြည်သူ့လွှတ်တော်မှ နောက်ဆုံးရသတင်းများကို ဖော်ပြထားကြောင်း သိရသည်။ ရေးသားသူ -ထွန်းထွန်း