ရပ်နားထားသည့် စီဒီအမ်အေ ၈၀၀ မိုဘိုင်းဖုန်းများကို ပြန်လည်ချထားပေး

မြန်မာ့ဆက်သွယ်ရေးလုပ်ငန်းအနေဖြင့် အချိန်ကြာမြင့်စွာ ရပ်နားထားရှိခဲ့သည့် စီဒီအမ်အေ ၈၀၀ မိုဘိုင်းဖုန်းများကို ပြန်လည်ရောင်းချပေးလျက်ရှိသည်ဟု သိရသည်။ ယခင်က ငွေကျပ် ၅ သိန်းဖြင့် ရောင်းချခဲ့သည့် ဖုန်းလိုင်းများဖြစ်ပြီး ယခုအခါ၌ ငွေကျပ် ၂ သိန်းခွဲဖြင့် ပြန်လည်ရောင်းချပေးနေခြင်း ဖြစ်သည်။ ၂ သိန်းဂျီအက်စ်အမ်ဖုန်းလိုင်းများ ချထားမပေးခင်အချိန်မှစတင်၍ စီဒီအမ်အေ ၈၀၀ မို ဘိုင်းဖုန်းရောင်းချခြင်းကို ရပ်နားထားရှိခဲ့ခြင်းဖြစ်ပြီး ဇူလိုင်လ ၁ ရက်နေ့မှသာ ပြန်လည်ချထားပေးခဲ့ခြင်းဖြစ်သည်။ ယခင်က လိုင်းဆွဲအားကောင်းမွန်သည်ဟုဆိုကာ ၀ယ်လိုအားမြင့်တက်လာခဲ့သည့် စီဒီအမ်အေ ၈၀၀ မိုဘိုင်းဖုန်းလိုင်းများသည် ပြင်ပပေါက်ဈေး ငွေကျပ် ၇ သိန်းခွဲအထိ မြင့်တက်ခဲ့ဖူးသည်။ စီဒီအမ်အေ ၈၀၀ မိုဘိုင်းဖုန်းလိုင်းများမှာ EVDO နည်းပညာဖြင့် အင်တာနက်အသုံးပြုနိုင်သည့် မိုဘိုင်းဖုန်းလိုင်းများဖြစ်ကြပြီး 3G စနစ်ကို အခြေခံထားကြောင်းသိရသည်။ “အခုရွှေဂုံတိုင်ရုံးမှာ စီဒီအမ်အေ ၈၀၀ မိုဘိုင်းဖုန်းကိုတန်းစီပြီး ၀ယ်နေကြတဲ့လူတွေ အများကြီးပဲ။ တစ်ရက်ကို လျှောက်လွှာ ၁၀၀ ပဲ လက်ခံတယ်လို့ပြောတယ်။ ၁၀၀ ကျော်သွားရင်တော့ နောက်ရက်မှလုပ်ပေးတာပေါ့” ဟုဆက်သွယ်ရေးရုံးသို့ အင်တာနက်လိုင်း သွားရောက်လျှောက်ထားသူတစ်ဦးက ပြောသည်။ ငွေကျပ် ၂ သိန်းခွဲဖြင့် ချထားပေးနေသည့် အဆိုပါစီဒီအမ်အေ ၈၀၀ မိုဘိုင်းဖုန်းလိုင်းများကို ငွေကျပ် ၁ သောင်းထပ်မံပေးသွင်း၍ အင်တာနက်လိုင်များ လျှောက်ထားနိုင်မည်ဖြစ်ပြီး အသုံးပြုခဘီလ်ဈေးနှုန်းကိုမှု တစ်မိနစ်လျှင် ၄ ကျပ် နှုန်းအဖြစ် မြန်မာ့ဆက်သွယ်ရေးလုပ်ငန်းမှ သတ်မှတ်ထားရှိသည်။ အဆိုပါဖုန်းလိုင်းများကို ရန်ကုန်မြို့၌ ရွှေဂုံတိုင်ဆက်သွယ်ရေးရုံး၊ အလုံဆက်သွယ်ရေးရုံးနှင့် ပန်းဆိုးတန်းဆက်သွယ်ရေးရုံးတို့တွင် လျှောက်ထားမှုများ ပြုလုပ်ဆောင်ရွက်ပြီး အခြားသော ပြည်နယ်နှင့်တိုင်းများ၌ သက်ဆိုင်ရာဆက်သွယ်ရေးရုံးများတွင် ၀ယ်ယူနိုင်မည်ဖြစ်သည်။